【識港網訊】做藝人一定有新聞，有人就覺得寧願有負面新聞，都好過冇新聞，至少有人知自己個名丫嘛！以下呢個藝人（或者而家叫佢YouTuber合適啲），喺Tvb時，佢一直都撈唔起，或做啲行行企企角色。結果一次“殘廁Gathering”，佢就紅咗，而且好快離開埋TVB。估唔到離開TVB，就係佢翻身嘅好機會！冇錯，佢就係Coffee林芊妤，到底Coffee點解而家咁成功，我歸納咗以下幾點。

（一）勇敢離開舒適圈

聽過唔少人話，當年“殘廁Gathering”係佢同記者一齊夾新聞，目的就係為咗迫TVB同自己解約，唔想再一世困喺呢個發展唔到嘅地方。新聞一出，罵聲四起係意料中事，TVB亦即刻同佢解約，大家因為呢件事完結咗賓主關係。不論佢有心定冇心，但係離開一個被困嘅地方，先至有自由嘅空氣，先至有其他發展嘅機會。

（二）積極發展自己事業

Coffee非常積極裝備自己，做瑜伽老師，做Youtuber拍片教人做運動，可以講係永遠嘅財路，因為美容、健身呢啲從來唔會過時。Coffee練出一身好身材，叫各位女士都勁羨慕，自然越嚟越受歡迎！

（三）發放正能量

每次睇Coffee嘅片，都會覺得好開心，因為無論嗰Set運動幾辛苦都好，佢都係笑住同大家一齊做，仲會不停鼓勵大家：“美腿！”“堅持！”，令人感受到佢嘅正能量。

（四）熱愛家庭

近年Coffee做埋媽媽，不時分享同仔仔伯伯嘅生活趣事。而仔仔又非常可愛趣致，一眾網友都十分喜歡呢兩母子。Coffee更成日花痴上身，攬住仔仔錫錫，令到大家都睇得好開心，同時覺得佢係工作同家庭都兼顧到嘅好媽媽！

原文鏈接：https://m.orangenews.hk/details?recommendId=139920