移動版
在這裏認識香港



囝囡不是解決婚姻問題的工具
作者:港女友   來源:橙新聞    2018-12-28 12:03
啲人成日都話「生仔要考牌」,我本人真係非常同意,無耐性、無愛心、無腦嘅人真係唔好生仔啦,何必害己害人呀?除此之外,仲有一堆夫婦將囝囡當成工具,兩個人之間有問題呀?生個仔啦,有咗小朋友就會好啲啦。

【識港網訊】啲人成日都話「生仔要考牌」,我本人真係非常同意,無耐性、無愛心、無腦嘅人真係唔好生仔啦,何必害己害人呀?除此之外,仲有一堆夫婦將囝囡當成工具,兩個人之間有問題呀?生個仔啦,有咗小朋友就會好啲啦。個男人唔定性呀?生個仔啦,做咗爸爸就會定啲啦。兩個人生活好悶無火花呀?生個仔啦,有咗小朋友就有新目標啦。生小朋友唔係幫你解決婚姻問題嘅工具,咁做只係兩個大人逃避問題嘅藉口。

新華社圖片

我唔係話生仔一定要有啲咩好高尚嘅理由,而係我反對用小朋友去作為解決問題嘅方法。

如果兩個人之間有問題,你哋唔好好去解決,反而仲要強行將另一條生命夾喺你哋之間,係好不負責任同自私嘅做法。而且我好相信,問題並唔會因為有咗小朋友而迎刃而解,只會令問題變得更加複雜,將綁住兩個人嘅繩拉得更緊,更加錯綜複雜。

但偏偏好多人都堅信生小朋友係可以拯救婚姻,但其實說到底,只係逃避兩個人嘅問題,將注意力轉移去小朋友身上,而唔再係轉注喺對方身上,問題並無消失,只係唔再係鎂光燈之下咁刺眼。

我最反對嘅原因係我覺得一個成年人應該對一條生命負責任,如果你嘅婚姻有危機,何苦要將一條小生命帶入呢個有危機嘅家庭?如果你哋未ready做爸媽,何必要強逼自己做父母呢?「生仔」唔係結婚嘅唯一目的,更加唔係幫你建立美滿家庭嘅方法,拜託唔好再用「生仔」去綁住一個男人,唔好將留住老公個心嘅責任,轉嫁畀一條無辜嘅小生命。

原文鏈接:http://www.orangenews.hk/officelady/system/2018/12/18/010105990.shtml

责任编辑:syq