移動版
在這裏認識香港



愛情中,毋忘初心很重要
作者:港女友   來源:橙新聞    2018-12-14 12:22
愛情同人生一樣,如果半路忘記咗出發時嘅自己,忘記自己當初係為咗咩而出發,咁樣就好似愈行愈偏離軌道,現實同理想嘅差距亦愈嚟愈大。

【識港網訊】愛情同人生一樣,如果半路忘記咗出發時嘅自己,忘記自己當初係為咗咩而出發,咁樣就好似愈行愈偏離軌道,現實同理想嘅差距亦愈嚟愈大。喺愛情初初來臨嘅時候,你總係想用盡全力,花盡心思去愛,想畀對方最好嘅東西同最好嘅自己。可惜時間過去,愛情慢慢就會變得理所當然,人就會忘記咗當初愛上呢個人嘅熾熱心情,忘記咗當初嘅甜蜜同快樂,然後好多愛情都因此而被消耗盡,再慢慢死亡。

(資料圖片)

記得幾年前,身邊一個男仔朋友好迷戀一個女仔,不惜一切代價都想追到呢位佢眼中嘅女神。當年佢試過喺女神屋企樓下等咗一晚,為嘅就係等女神番屋企前可以收到自己整嘅生日蛋糕。到後來佢真係追到女神,佢好似得到全世界一樣,拍拖半年都未夠就話想結婚,想畀最好嘅野呢個女仔。

然後鏡頭一轉去到幾年後,拍拖三年之後嘅佢哋感情出現咗好大危機,面臨分手。原因就係個男仔開始覺得個女仔好煩好痴身,覺得成日被管,覺得無自由,於是佢開始對呢段關係失去耐性,我哋開始不斷聽到佢批評呢個女仔嘅說話。

(資料圖片)

有一次我哋終於忍唔住開口問:「當日你唔係愛呢個女仔愛到要生要死咩?」男仔話:「唔知點解呢種感覺好似係好耐好耐之前嘅事,耐到我完全記唔起,都想像唔到當日自己點解可以咁癲!」

時間真係會令人忘記好多事,同時亦都磨蝕緊好多嘢。每段關係都有高低起伏,最重要嘅並唔係學識點樣永遠留住高潮,點樣永遠停喺高點,而係喺低潮時,唔好淨係放大負面嘅東西,反而要更加落力提醒自己,呢個人同呢段感情曾經為你做過咩,曾經帶過啲咩畀你。

原文鏈接:http://www.orangenews.hk/officelady/system/2018/12/04/010104912.shtml

责任编辑:syq