【識港網訊】藝人惠英紅有份主演嘅《鐵探》收視報捷，錄得33點高收視，紅姐曾經講過如果收視高過30點就會絲襪笠頭「找數」。如今目標達成，紅姐亦喺今日做找數真英「紅」！

片中見到着上便服嘅紅姐現身港鐵站，仲「萬晞華」上身，講到明係嚟找數，仲話如果唔係點管治西九總區，同時佢亦警告黑仔姜皓文唔好走數：「我記得當日記者會，姜皓文黑仔都有話過佢找數嘅，黑仔我正式Call你喇，睇你喇，我依家就入去找數喇﹗」

講完之後紅姐隨即拎起藍色絲襪笠頭，仲擺埋嬌俏嘅姿勢賣萌，然後大步走入港鐵站，不過期間佢都忍唔住大笑掩蓋尷尬，之後紅姐入咗一間麵包舖買麵包，再喺站內行咗個圈嚟完成任務，最後佢話：「我覺得最緊要開心，如果我可以將自己開心SHARE出去幾好呀，我找咗數喇，姜皓文，交個波畀你喇。」

唔少網民都大讚紅姐勁正，至於黑仔亦有留言話「收到」，睇嚟大家可以期待吓黑仔點找數啦！

原文鏈接：http://www.orangenews.hk/officelady/system/2019/05/21/010117169.shtml