【識港網訊】ViuTV上年舉辦嘅選秀節目《全民造星》，造就咗兩隊男團MIRROR同ERROR，雖然兩隊組合出道時間尚短，但已經成功喺依家韓團當道嘅情況下殺出重圍，吸引大批粉絲追星，絕對不能忽視！

眼見《全民造星》嘅成功，ViuTV唔夠一年就決定推出《全民造星II》，並喺今日於Facebook專頁公開最新招募片段，片段仲播出一班囝囝由比賽到成團，再到成名嘅過程，至於留言中更講到：「就算你唔識派心心、流唔到韓劇眼淚、無強大嘅伯娘支持、身高又冇193…只要你想做明星、鍾意表演、鍾意不斷成長，都可以報名！造星嘅舞台絕對會令你有超乎想像嘅蛻變，除咗有星級導師將你level up，仲可以識到一班陪你奮鬥、陪你進步嘅好兄弟！」

招募片段公開後，雖然有部分網民即刻叫朋友參加，但有唔少MIRROR同ERROR嘅粉絲已經大表不滿，認為ViuTV連MIRROR同ERROR都仲未真正捧紅，冇必要相隔咁短時間就推出新一季：「起碼第一屆嘅師兄在圈內夠成熟去帶師弟上位嘛，而家咁樣搞法好易兩頭唔到岸」、「真心唔想咁快出第2輯」、「咁快？！唔該捧紅『超級冠軍』先啦！重有MIRROR 同ERROR 都未真係爆紅，又選一班仔仔出嚟爭食咩？」

原文鏈接：http://www.orangenews.hk/officelady/system/2019/03/25/010112996.shtml