【識港網訊】「大帥哥」張衞健主演嘅無綫劇集《大帥哥》喺播出嗰陣大受觀眾歡迎，連帶佢劇中3個老婆「沅婉」蔡思貝、「艾妞」楊秀惠同「天嬌」譚凱琪人氣急升！雖然戲內3位姨太不時爭寵鬥氣，但戲外佢哋就好好朋友，就算劇集完咗一段時間，佢哋都仲會相約聚會，呢日佢哋更背住「大帥哥」約「馬炭」洪永城（Tony）睇戲兼食飯！

Tony同楊秀惠分別喺社交網上載聚會嘅相，見到相中3位靚女好一致咁戴咗白色Cap帽，而且素顏上陣，同時佢哋拎住戲飛又拎住美食影相，實行睇戲食飯直落！至於洪永城就搞笑咁向「大帥哥」張衞健報寸，Tag咗對方並留言：「大帥哥，我發現咗你啲老婆夜晚出去獵食。#乜而家女士潮流興帶白色帽嗎？」唔少網民都話「馬炭」要保護咁多位阿嫂：「tamama執行護衛任務」、「辛苦你要陪三位少奶奶宵夜」

原文鏈接：http://www.orangenews.hk/officelady/system/2019/03/25/010112981.shtml